Sagan okkar

Útgáfufélagið Sunnuhvoll er aftur komið á kreik eftir 14 ára hlé.

Félagið var fyrst stofnað 2002 og gaf þá út bækur eftir Diane Gossen og félaga um Uppbyggingarstefnuna í skólastarfi (e. Realrestitution). Áhugamannafélagið Uppbygging sjálfsaga, keypti bókalager og útgáfuréttindi Sunnuhvols 2012 og hefur bækur til sölu á heimasíðu sinni uppbygging.is (Hnappurinn aðrar bækur hér á síðunni)

Hinn nýi Sunnuhvoll hóf starfsemi sína á ný með því að kaupa aftur útgáfuréttinn af Uppeldi til ábyrgðar, fyrstu bók Diane Gossen sem út kom á íslensku. Bækur hennar lýsa fyrst og fremst aðferðum við að byggja upp og efla góð samskipti í skólum. 

Auk aðferðarfræði Diane í bókinni Uppeldi til ábyrgðar verður boðið upp á þýddar bækur fleiri höfunda um uppeldis- og sálarfræði fyrir skóla og heimili.

Nú er áherslan á hugmyndafræðina að baki aðferða Diane. Við byrjum á rafbókum og kiljum en ætlunin er að gefa líka úr hljóðbækur. 

Sem fyrr er tilgangur útgáfunnar að bæta og efla íslenskt skólastarf með því að kynna ákveðnar aðferðir og nú einkum hugmyndafræði Hins góða skóla (Glasser) og Uppbyggingarskóla (Diane). (e. Quality School / Restitution School)

Höfundarnir sem hér eru og verða kynntir leitast allir við að dýpka skilning á mannlegri hegðun og samskiptum fólks. Hér er því um að ræða námsefni til sjálfsþekkingar.

Góður skóli / Uppbyggingarskóli, samkvæmt skilningi okkar, (sbr. Glasser, Gossen, Ford) hefur það á stundaskrá sinni og kennir markvisst öllum, börnum og fullorðnum, að þekkja þarfir sínar og tilfinningar, og sinna þeim af ábyrgð. Hann byggir upp og styrkir tengsl og sjálfræði sem hvort tveggja styður við áhugann á að læra og er svo nauðsynlegt andlegri heilsu. Hann kemur öllum til nokkurs þroska, því þar fær hver og einn að njóta hæfileika sinna. Þar eru skilyrði fyrir sköpunarkraftinn til að blómstra.

Í Góðum skóla / Uppbyggingarskóla eru sköpuð skilyrði til að nemendur geti lært að þekkja sjálfa sig, tilfinningar sínar og þarfir vegna þess að hver og einn þarf að hafa stjórn á lífi sínu, njóta sín, finna fyrir sjálfsvirðingu, fá að tilheyra og elska.